金句王黎明，每次被問及戀情或相關新聞時，必自創金句回應，不過黎天王的金句並不是每一句都「雅俗共賞」，所以大部分均是令人O嘴收場。
06年1月
情況：記者問黎明是否堅持40歲之前不結婚。
黎明金句：「當一支花變成一支花嘅時候，係咪就變成一支梗？咁就冇人知喇！」
O嘴指數：★★★★★★
O嘴原因：答案與問題完全「九唔搭八」，令人摸不着頭腦。
08年8月
情況：記者問到衞蘭及衞詩遭封殺傳聞。
黎明金句：「坎坷過後有艇搭」
O嘴指數：★★★★
O嘴原因：連「蘇州過後冇艇搭」呢句俗語都可以攞嚟「改頭換面」，黎明果然情急智生！
09年1月
情況：有傳黎明新居被偷拍，記者問黎明會否覺得不安全。
黎明金句：「小時行街會踩釘，食飯盒又會有曱甴，食菜又有毛蟲，我擔心自身安全多啲。」
O嘴指數：★★★★★1/2
O嘴原因：一個家居安全問題，竟然可以令黎明聯想到咁多自身安全問題，個腦果然轉得夠快。
09年2月
情況：黎明與舊愛舒淇同場，記者問黎明會否大方與舒淇打招呼。
黎明金句：「如果見面唔打招呼係我嘅問題，我係正常人，唔會發生喺我身上。（再見亦是朋友？）呢個迷津答你唔到。」
O嘴指數：★★★★1/2
O嘴原因：一個咁簡單嘅問題，黎明都有能耐答到咁玄，點可以唔O嘴?