薛凱琪師弟周子揚在18歲時，曾到美國學音樂兩年，然後再到台灣上藝人訓練班，他感激家人多年來的支持：「我爸爸媽媽好特別，佢哋見我有興趣嘅事都由得我做。（從未反對？）我冇講明要做藝人，而且佢哋見我做得開心就得，唔會支持或者反對。」子揚坦言視當藝人為人生目標及理想，而且從小就表演欲十足：「朗誦、唱歌比賽都會參加，不過我讀男校冇機會做風頭躉！」

睇書啟發靈感

子揚表示在台灣學當藝人期間，曾接觸過很多音樂人：「嗰時每日都過得好充實，健身、學國語、學寫歌、編曲、跳舞，仲要每星期交讀書報告，好全面！（讀書報告？）係呀，睇多啲書可以啟發靈感嘛！」

另外，子揚表示非常欣賞陳奕迅，希望能學習對方唱現場時的感染力，他又謂：「仲有我都好想同方大同仲有薛凱琪合作，而王力宏、陶喆啲歌都好好聽，好有自己嘅性格。」對於近日大熱的o靚模潮，子揚不擔心會被搶鏡：「其實佢哋喺商業角度睇係好成功，我唔擔心被人搶風頭，最緊要做好自己本分！」

文：音樂組 攝：李廣成