新人林司敏（Ciwi）受到寰宇公司力捧，小妮子不敢怠慢積極裝備自己強勢出擊。除了每星期跟老師練習唱歌外，亦跟隨導師學習跳舞，務求以勁舞配合派台歌，帶給fans新驚喜。

曾學芭蕾舞

Ciwi於排舞時相當落力，側手翻、拱橋、壓腿拉筋絕不馬虎。她說：「其實細個已經學芭蕾舞，但後來因發現我啲筋骨較硬唔夠軟，所以冇再學。依家再上堂學舞，體力上都可以嘅。」

對新人來說，能一口氣拍下《愛出貓》和《童眼》兩部電影是相當難得的難會，Ciwi非常多謝公司栽培：「公司畀咗好多機會我，我會盡力做到最好回報公司對我嘅厚愛。」

精通普通話

貴為影壇新人的Ciwi，非常感激同劇演員和導演協助：「因為我始終係新人，好多嘢對我嚟講都係好新鮮。多謝佢哋教我好多嘢，令我畢生受用！」師姐江若琳在娛樂圈成績大家有目共睹，視師姐為偶像和進發目標的Ciwi，希望有朝一日會有江若琳的卓越成績。

另外，除了工作外，Ciwi已報讀普通話導師課程。說得一口流利普通話的她有興趣當導師，希望將自己懂得的東西教給別人。

文：影視組

化妝：田源@Picturesque Gate

髮型：Sam Cheung @ HAIR

服裝：Charming Ball

場地：Crew Players Dance Complex