詩雅拍戲一部接一部，《很想和你在一起》上映後，緊接《愛出貓》於下月初推出。今次詩雅依舊被委派與「同門師兄」談戀愛，繼洪卓立及陳家樂之後，今次終於輪到與跳得之人William談情。

劇情講述詩雅對William生愛意，卻遭林司敏（Ciwi）從中作梗。今次詩雅為William花盡心思：「我去偷拍佢跳舞，然後將片段製成VCD送畀佢，呢啲嘢我平日真係唔敢做，遇到心儀嘅男士，最多都只係暗地裏偷望對方咋！」

被讚好戲

由於詩雅先暗戀William，導演安排她請對方「食波餅」，製造機會讓二人培養真感情：「我個角色係排球隊隊長，有次練波唔覺意打中William塊面，仲整傷埋佢手腕，咁先有機會見吓面，仲乘機向佢示愛呀！」詩雅演來要眼淚有眼淚，結果被William大讚好戲，詩雅則解釋謂：「我要放聲痛罵Ciwi，鬧好朋友真係好心痛嘅，所以好自然就感到鼻酸同流淚啦。」

在戲中要主動溝仔的詩雅，現實卻是愛情怕醜草。

詩雅（右）及Ciwi戲裏戲外都情同姊妹。

友情第一

雖然今次扮演情敵，不過詩雅及Ciwi則異口同聲表示現實生活中一定是友情比愛情重要，而詩雅則慶幸從未遇過這樣不幸的事情。

至於William則打趣投訴導演並未為他製造機會一親香澤：「連洪卓立都有得咀，點解呢次我同詩雅戀得清純過清純，淨係兩小無猜呢？」

文：影視組