因書展及動漫節愈炒愈熱的o靚模潮，造就了尹晞（Yumi）及陳若嵐（Melody）等相繼彈出。但隨着o靚模熱冷卻，Yumi與Melody亦相繼後勁不繼，Yumi因爆房事件遭雪藏，慘遭連累的Melody只好報讀進修課程增值自己，可惜在校內期間她亦慘遭同學杯葛，認真慘情！
Yumi早前因被踢爆與男友於酒店過夜人氣下滑，更遭公司雪藏勒令反省，想不到除了Yumi事業告急外，連帶原本與她拍住上的Melody亦受影響，工作量大不如前。她為了不浪費時間，遂報讀嶺南大學的進修課程增值自己，靜待時機以最佳狀態再度出擊。
男同學讚靚女
昨日下午二時，記者發現身穿連身裙的Melody，完成工作後趕入屯門上課，Melody甫下車即拔足狂奔，由於腳踏三吋高跟鞋及拿着一大堆參考書，Melody上落樓梯時將手上東西跌至一地都是，狼狽的她只好俯身執拾。現場所見，Melody在校內全程「獨家村」，無論返學、放學以及課餘時間都是形單影隻，苦悶的她要以睇notes、咬三文治及呆望別人玩遊戲打發時間。而在Melody發呆期間，有女同學在她身邊經過時竟當其透明，反而男同學則較為熱情，在canteen碰見Melody時會主動與她打招呼及讚她靚女。
為趙碩之辯護
事後問到Melody為何全程「獨家村」時，她直認在校內人際關係欠佳，女同學們更當她透明：「可能因為我係公眾人物，加上成日為咗做嘢走堂，啲女同學都唔係咁鍾意我。不過其實我有好多朋友㗎，只係咁啱佢哋今日唔得閒。」
另外，Melody昨日出席活動時，談到師姐趙碩之被指拍戲時犯下三宗罪以致被杯葛時，她即替師姐辯護道：「我又唔覺佢畀人杯葛，我同佢拍另一部戲時好開心喎，至於爆粗我覺得都係因為佢太投入角色啫。」Melody又暗寸事件是電影宣傳手法：「估唔到咁啱套戲一話上就有咁嘅傳聞。」
文：專案組