陳百祥（阿叻）與黃杏秀（秀姑）前晚在灣仔一西餐廳設宴，慶祝結婚三十周年，一眾圈中好友均有到賀，當中包括有譚詠麟（阿倫）、曾志偉、王晶、馬德鐘、鍾鎮濤（阿Ｂ）與妻子范姜及郭政鴻等，場面熱鬧。

打不還手 罵不還口

期間阿叻除了帶備廿支三十年酒齡的靚酒款待到場嘉賓外，又向現場人士承諾，會實現秀姑多年唯一願望「打不還手，罵不還口」，並大讚秀姑係仙女下凡，二人大晒恩愛，認真甜到漏，他說：「今年我會改過自新，我已下決心要咁做，呢三日半粒粗口都冇講過，以前我輸波會踢人發洩，呢幾日都冇呢個情況出現，我要做番普通人。（你有冇要求秀姑為你改乜？）乜都唔使，佢唔係人，係仙女下凡，我都享受咗三十年，好命嘅話仲有幾十年過，嚟緊呢幾十年到佢享受番，如果真係改到啲陋習，真係榮華富貴。」

場內激吻 脷疊住脷

此外，阿叻對於李克勤、張學友未能出席他的結婚周年晚會，感到有點遺憾，而提到劉德華與朱麗倩十指緊扣現身機場一事，阿叻就話：「永遠唔會諗人哋做乜，華仔係我其中一個細佬，都戥佢開心，佢有自己一套，我點都會支持。」至於，阿倫就笑指阿叻與秀姑在場內不斷激吻，二人脷疊脷。而阿Ｂ對於阿叻要立品，表示支持，還指他當晚表現甚佳，真係一句粗口都冇講過。

文：影視組