陳奕迅（Eason）和謝安琪（Kay）緋聞滿天飛，前晚兩人雖同場，卻避嫌前後腳現身，Kay整晚黐住老公張繼聰，Eason更怒斥緋聞太荒謬，忍無可忍說：「懷疑有人搞事！」
前晚逾百藝人出席酒會，包括張學友、譚詠麟、楊千嬅、容祖兒、蔡卓妍等，至於緋聞男女Eason和Kay雖同一唱片公司，卻刻意前後腳出現，避過合照機會，而Kay在酒會內全程黐住老公晒恩愛。
希望事情盡快完結
對於Kay早前被觀眾叫「收皮」，Eason避忌說：「關我乜事，我覺得再講我同Kay嘅新聞好無聊，我哋係朋友關係，緋聞太荒謬，最初都唔介意，但依家懷疑有人搞事，一定要停止，呢個笑話講得太大。（有傳何韻詩係搞事者？）一定唔係。」
Kay離開酒會後，即趕往灣仔做音樂會，換上大露背裙演唱，她與Eason所見略同：「一定有人做出嚟，但冇諗過乜人做，希望件事要完。」至於緋聞已發展成五角戀，Kay沒好氣說：「好離譜，已經唔係新聞，係創作故事，好似電視劇咁，冇感覺。」
徐濠縈婚後冇人追
而徐濠縈昨日出席Bertolucci活動，被問若Eason和Kay一起出埠有冇問題？她窒一窒說：「睇吓去邊，佢哋唔驚畀人影到至奇。」還強調婚後冇人追，笑說：「邊個敢挑戰歌神！」
文：音樂組