何尚謙在新戲《愛出貓》中飾演一腳踏兩船的花心男，經常要周旋於李蘊及鄧紫棋之間。雖然鏡頭前的James享盡艷福，不過鏡頭後的James卻被兩位女角折磨得不似人形，其中猶以G.E.M.最不懂溫柔，經常拍打及狂捏James宣洩不滿，James笑謂：「我哋喺片場成日都會玩Killer，佢兩個一輸除咗會尖叫之外，仲會係咁打我同捏我，真係搞到我一頭煙。」

平日不懂溫柔的G.E.M.，在片中對James千依百順。

李蘊（中）和G.E.M.戲裏戲外都會為James爭風呷醋。

曱甴反擊

James又表示，G.E.M.及李蘊為了投入角色，更經常為他爭風呷醋，弄得他啼笑皆非：「有時一齊拍戲，G.E.M.見到我同李蘊有親熱戲，佢就會扮呷醋話：『得啦！你拖佢得啦！你唔好理我喇！』掉番轉李蘊都會咁做，真係畀佢兩個激死。」

備受「虐待」的James，曾試過乘機反整蠱G.E.M.，不過最終卻落得被謾罵收場：「有次我哋喺間好陰森嘅屋入面拍嘢，裏面仲有好多曱甴，我見G.E.M.好似好驚咁，咪係咁攞啲曱甴嚟嚇佢囉，點知佢失晒控係咁狂叫，結果我就畀副導演鬧！因為嗰時已經夜深，佢話驚咁嘈畀人投訴喎。」

文：專案組