鄧麗欣（Stephy）、余文樂、A.Lin昨日出席代言相機品牌活動，Stephy與樂仔在台上更親密玩自拍。訪問期間，Stephy忽然透露助手在昨日早上確診豬流感（H1N1甲型流感），巧合患上發燒與喉嚨痛的Stephy說：「一陣會趕去睇醫生，對個助手對咗成個月，自己都好驚！」Stephy更言隨時傳染緋聞男友方力申，她說：「尋晚《機器俠》首映佢坐我隔籬，（約埋睇醫生？）自己睇先啦，個助手都唔係好嚴重，依家自我隔離緊。」
拒收落地花
而樂仔得知Stephy同事患上豬流感亦略感吃驚說：「咁大鑊！怪唔知得佢換咗助手，Stephy話我知佢發燒咋！」
至於首映上獲小方送上玫瑰，Stephy竟不領情說：「我冇攞，因為跌咗落地下。（平日有冇送過？）冇呀，唔會無端端送花嘛，可能佢知我唔太鍾意收花。」Stephy又言最愛心思禮物，而舊男友為她親自下廚則最為深刻。
避過台水災
另外，談到台灣水災，樂仔就言在打風前一個星期剛巧身處台灣為周杰倫首部執導電視劇《熊貓人》客串，更一度打算留台學滑水，他說：「諗住留多兩日去墾丁學滑水，最後因為有工作所以取消咗返香港，台灣朋友都冇受到嚴重影響。」
採訪：音樂組