洪卓立、詩雅、陳家樂於旺角鬧市宣傳新片，吸引過百fans將他們重重包圍，現場群情洶湧，令到活動開始兩分鐘即告腰斬，原本沿途派扇的環節也只有臨時取消。
昨日下午，洪卓立、詩雅與陳家樂於旺角宣傳新片《很想和你在一起》，電影公司原本安排三人在行人專用區沿途向市民派扇，不過，活動未開始現場已聚集過百fans，高舉各人名牌為偶像打氣，及至三人到場，眾fans即不停叫囂，令到看熱鬧的人群愈聚愈多，結果擾攘多時仍然舉步維艱，最後只好草草影完相便結束，整個活動歷時兩分鐘即被腰斬。
詩雅獲兩男護花
詩雅其後接受訪問說：「真係有啲驚，尤其驚啲人推，其實前幾日我落嚟睇過，覺得好安全，唔係假日都有幾架警車，估唔到真係會咁多人。（驚唔驚發生鄭融被非禮事件？）我哋傾好咗，兩個男仔一左一右保護我，不過都好開心嘅，有咁多人支持我哋。」
票房好海鮮慶功
至於洪卓立和陳家樂則表示希望新片會贏得口碑和票房，洪卓立更說：「最好票房好，老闆會出錢畀我哋原班人馬拍多套。（票房好點樣慶功？）請大家食飯囉，不過要三個一齊請，可以分擔吓，最好食海鮮，我依家身體好番，可以食得。」
文：影視組