由「太陽報愛心基金」及「保良局扶弱基金」合辦的「心之書」贈書計劃昨日舉行，太陽報愛心基金總幹事鄧國雄、保良局主席何志豪、總理陳細潔亦有出席。何傲兒與陳柏宇則以嘉賓身份，與現場二百多位學生分享讀書心得，年紀輕輕已參選港姐的傲兒，從未踏進大學之門，故於台上感慨地說：「書到用時方恨少，所以大家應該好好珍惜，過程可能有困難，但只要有毅力就會捱過去，今日一定比尋日更好，大家一齊為目標進發。」說罷便一度哽咽，柏宇見狀即開腔打圓場。

何傲兒與陳柏宇與現場學生分享讀書心得。

何傲兒獲一眾代表頒發感謝狀。

未考慮結婚

對於師姐徐淑敏雙喜臨門，傲兒連番恭喜，笑言對此大感意外，她說：「我咁細個邊會諗結婚住，等25-35歲呢段時間都可以，依家想學多啲嘢先，增值下自己，例如唱歌、跳舞、演戲都有學，話唔定有不時之需呢！」

柏宇透露從小非讀書材料，所以未能與學生分享心得，他說：「讀書時期係最無憂無慮、最純真嘅時間，而且香港讀書壓力又大，所以要分配好邊段時間做咩，盡量用盡自己嘅青春啦！」

文：影視組