【袁霆深圳直擊】o靚模熱橫跨整個暑假，雖然外界對她們彈多過讚，不過勝在有噱頭。鍾蕙芝、胡心諾及劉欣宜更入侵大陸市場搵真銀，昨日應邀到深圳出席新片《功夫王》宣傳活動，監製更指Lavina等人有機會演出該片，與吳尊做對手戲。
鍾蕙芝（Lavina）、胡心諾（Rainbow）、劉欣宜（E Cup Baby）及李蘊昨日殺上大陸搵真銀，到深圳出席電影《功夫王》時尚新星新聞發布會，吸引不少途人圍觀。
李蘊做「中間人」
一直有傳Lavina與Rainbow唔妥E Cup Baby，昨日她們更將不和升級！穿得密實的E Cup Baby原本在台上拍照，未知是否怕與酥胸半露的Lavina爭「峰」頭，一見對方上台時，即匿埋不願合照！不過在記者強烈要求下，E Cup Baby才拉埋李蘊與Lavina和Rainbow合照，然而E Cup Baby與Lavina全程零交流，十足十陌路人。
雖然Lavina與E Cup Baby不和出晒面，不過《功夫王》的監製唔驚兩女面阻阻，有意找她們在片中演出，據知《功》片正力邀吳尊和李小璐擔任男女主角，故Lavina和E Cup Baby隨時與當紅偶像做對手戲。
目標十三億人口
首次到大陸出席活動的Lavina表示相當滿意酬金，很有興趣打入大陸市場。由於大陸對性感尺度非常敏感，問經常性感的Lavina擔不擔心？她說：「唔會，內地有十三億人口，市場好大，好多內地女星都好性感，只要唔好過火就得。」在旁的Rainbow亦搭嘴表示她們賣的是健康性感。兩女又透露在即將舉行的電腦節會有性感演出，明顯狙擊同樣會出席電腦節的周秀娜。Lavina更暗寸周秀娜年紀大：「各有各做，佢係我前輩，會好好向佢學習！」
有心避開Lavina的E Cup Baby，否認避忌對方。她說：「唔係避忌，我依家簽咗李蘊間公司，做佢小師妹，所以咪同佢一齊多啲囉。我唔想好似之前咁淨係做模特兒，以後會向歌影發展，唔想做一個冇內涵嘅人。」擺明寸爆Lavina！