陳偉霆（William）昨日出席沙灘舉行的活動，吸引大批歌迷及泳客圍觀，William冒住女友Angelababy呷醋餵三點式女歌迷食雪條，更獲對方胸壓手臂錫面回禮，認真艷福無邊。
William憑着健康活力大受廣告商歡迎，昨日穿背心短褲沙灘look亮相，烈日當空下與大會安排的Baby玩遊戲，期間William應要求拉了一位穿上三點式歌迷上台，並餵對方食新口味雪條，引得全場歌迷
嘩鬼叫。
口快快認戀情
由於女歌迷右手翹實偶像左手，當她側身親吻William時，右胸壓着偶像左臂，難怪William露出一副「冧」樣。問他事前有否向女友Angelababy備案？William說：「冇，係客戶安排，我好尊重客戶。」William坦言近日出席活動都有不少Baby出現，問到家中的Baby是哪種Baby？不肯公開戀情的William口快快說：「Angelababy囉。」自知講錯說話的他即澄清：「以為你問邊個Baby，OK。」
熱愛戶外活動的William透露入行至今未試過穿三角泳褲，他說：「因為太幼。（邊度幼？）對腳呀。」記者笑言以為他所指是「何B仔」，William信心十足說：「嗰啲就收埋喇。」問到是否留給Angelababy睇？他尷尬說：「唔係。」
Baby有家人泵水
而前晚Angelababy出席I.T時裝騷時表示：「我一向都好慳家，依家好啲，每季會花幾萬蚊買衫，當係投資囉！」她又表示初出道時沒收入好慘，幸好有家人支持，她說：「佢哋每個月畀錢我買衫，我依家每個月都有畀家用。（你係家庭支柱？）唔算係，不過都要儲定錢，將來爹哋媽咪年紀大咗，支持個家都係落喺我度！」
此外，Baby又表示下半年除拍戲外，還會多留在日本發展，她說：「接咗兩部電影，遲啲會返日本行騷，並與三個少男組合拍MV。」問到今年豬籠入水，會否擔心交稅？她說：「唔驚！公司幫我睇住條數，會有人幫我處理。」
文：音樂組