成龍曾在自傳中，借大師兄洪金寶之口，說出與元彪的關係，成龍寫道：「元彪胃痛，呻吟起來，元華說『我聽說胃不舒服時，抽煙不失為一種好方法』，為救元彪的命，得有人溜進師傅師母的房間偷幾支煙出來。我們在討論誰最適合做這件事，大師兄說：『讓大鼻子去，因為元彪是你最要好的朋友。』」成龍願為元彪鋌而走險，可見兩人交情不淺。

物資貧乏‧食得是福

正如元彪之前的剖析，童年時的七小福友情主要建立於一個「食」字，其次便是「玩」，小朋友的表現往往最真摯直接，在一個物資缺乏的年代，這種坦率更為明顯，元彪說：「我哋嗰時冇幾何有玩具玩，有時玩到冇嘢好玩，試過隨街執啲爛遮返嚟拆骨，跟住削尖佢嚟做箭，咁都玩得一餐。有次我父母嚟學校探我，買咗盒玩具飛鏢畀我玩，成班師兄弟難得見到玩具，即刻圍晒埋嚟，咁我掛起個靶咪玩囉，諗住飛完第一支，就飛第二、第三支，點知成龍突然一支箭咁標埋去個靶度，佢諗住即刻掹支鏢出嚟輪到佢掟，我都唔為意佢會咁心急，結果『卜』一聲，成支鏢插咗落佢個嘴度。」

飛鏢無眼，倘若插中的不是嘴而是眼，後果真不堪設想，貪玩當然要付出代價，這次算是不幸中之大幸。

父母疼錫‧非有家底

或者是闖過大禍，人也變得成熟，元彪談到有指他在中國戲劇學院學藝時，已甚有家底，更有傭人專誠到學校服侍他沖涼，對此元彪否認，並指自己沒有那麼少爺仔脾氣，他說：「嗰個年代制水，人人冇水用，父母知我太細個唔識照顧自己，所以日日攞埋水嚟畀我沖涼；知道學校啲飯餸唔係咁好，佢哋又送飯嚟學校畀我，呢啲都係我父母錫我嘅緣故啫！」

（四十四）