杜琪峯昨日率領《復仇》的一眾演員出席電影節開幕禮，在片中跟法國的男星兼歌手Johnny Hallyday合作的他大讚對方友善兼冇架子，反而寸爆香港的「天王巨星」要求多多又難服侍。
在香港舉行的《夏日國際電影節2009》前晚正式開幕，杜琪峯首部外語片《復仇》成為開幕電影，閉幕電影為美國浪漫喜劇《心跳500天》。杜琪峯率領黃秋生、任達華、林家棟、葉璇和邵美琪等《復仇》的演員現身開幕禮，劉心悠及任賢齊等則到場欣賞，場面熱鬧。
秋生唔係巨星
開幕禮上，杜琪峯直言香港的天王巨星牢騷多，但來自法國的Johnny Hallyday卻非常友善。秋生聞言後笑說：「初初以為係話我牢騷，講到天王巨星我先至放心，因為我唔係。」
活動後杜琪峯大讚Johnny說：「佢喺歐洲好出名，紅足五十幾年，今年嘅演唱會都超過二百場，人哋嘅容忍度比香港啲天王巨星高好多，可能香港地頭蟲惡啲。」他又寸爆指香港藝人出入均有多位助手服侍：「香港啲天王巨星都有好多姨媽姑姐跟出跟入。」問他是否經常受香港明星的氣？杜琪峯語帶譏諷道：「每一個人嘅情緒時時都唔同，好似周星馳有時都好友善㗎。」
家棟留鬚生瘡
同場的林家棟以留鬚Look示人，他表示這是《童眼》的造型，但在吃東西時卻經常抹不乾淨以致生暗瘡。而任達華則自爆被宣傳電話騷擾，希望政府能立例阻止。
另外，有外國消息指正於法國度假的Johnny，玩遊艇時臀部受傷，要即時送院接受手術，傷勢更影響他即將舉行為期兩年的告別演唱會，最後可能演出無期。
文：影視組