周麗淇（Niki）早前遠赴日本一個月拍攝其個人特輯，昨日她出席特輯記者會，透露自己在當地一間專門讓人求姻緣的廟宇中寫下願望，希望找到一個愛她一生一世的男人！
周麗淇昨日在將軍澳電視城出席其個人特輯《櫻‧紅醉了》的記者會。Niki透露，記者會本應在老闆羅傑承的船上舉行，可是因天氣欠佳而改地點，令到不少原先邀請了的嘉賓未能到場。而曾跟Niki合作拍攝劇集的米雪則神秘現身撐場，令她驚喜萬分。
髮型師唔係拖友
Niki表示，這個特輯到日本的東北拍了整整一個月，問到她可有艷遇？她說：「冇咁快有啦，喺日本都溝通唔到，不過我有去一間姻緣廟，寫咗願望喺條紅絲巾上，之後要單手掛上願望樹。（寫咗咩？）搵一個愛我一生一世、乖乖哋嘅男仔。（之前嗰啲唔乖？）唔係！」早前有報道指她與一名髮型師拍拖，Niki大方回應 ：「唔係拍拖。（佢追你？）黐線，唔會啦，我哋識咗好耐，未入行前已經識，好好朋友。」
米雪現身好感動
問到Niki可心急找個伴結婚？她坦言自己毫不心急，至於是否怕爬家姐頭？Niki說：「咁又唔係，屋企無所謂，不過我搵到先算啦。」對於米雪現身撐場，Niki大為感動地說：「我叫佢做阿媽，之前拍劇時米記做我媽咪，我好少抽離唔到角色，佢真係好好人，心地同工作態度都好好。（有冇催佢結婚？）我唔敢呀，佢開心就得啦！」此外，Niki昨接受查小欣的《巴巴閉邊個夠我查篤撐》訪問時，亦表示眾多前輩中最欣賞米雪。
文：影視組