偷食不成‧當堂斷正

事件背後，原來與元彪有莫大關係，元彪說：「我同元文、元德年紀差唔多，係學校最細嗰幾個，所以我哋三個特別玩得埋。嗰時我哋學校喺尖沙咀美麗都大廈十三樓，樓下有好多咖啡廳，有次元文同我講話帶我落去買牛肉包，我就跟住佢落樓。都未行到去間咖啡廳度，離遠已經睇到師傅坐咗喺度歎茶，我兩個即刻一支箭咁標返上樓，求神拜佛咪被師傅到，以為師傅唔知就乜事都冇，點知都係呃佢唔到。」

遭于占元撞破落街「偷食」的元文、元彪，只好硬着頭皮面對于師傅的抽秤，元彪說：「師傅返到學校問元文：『元文，你去哪？』元文聽到師傅咁問已經騰晒雞，佢話：『我……元彪說想吃牛肉包，我帶他去買。』佢咁講喎，好在師傅挑通眼眉，鬧佢：『叫你買就買，叫你吃屎，你吃不吃？元德，還不進去拉屎給元文吃！』元德聽到師傅無端端叫自己個名，嚇到三魂唔見七魄，真係走入廁所喎，但臨時臨急，驚到騰騰震咁點屙吖！元德之後捧住『的屎得咁多』嘅屎行番出嚟，口震震咁同師傅講：『師傅，我……我……我拉完啦！』」

師傅指令‧無從違抗

這宗陳年舊「屎」，今日回看雖已事過境遷，但元彪說起來仍是猶有餘悸，可見一眾師兄弟早已將師傅的指令視若金科玉律，無可違抗，元彪說：「師傅叫元德：『快拿給元文吃！』元德捧住啲屎走埋元文度，元文苦埋口面準備拎起擺入口之際，師傅喺佢後面兜巴打落去，大喝一聲：『屎也吃，沒出息！』元文最終都冇食到，但由呢件事你可以睇到我哋係幾咁驚師傅，師傅叫食屎，冇人敢唔聽，師傅叫屙屎，冇都要照屙。師傅，師傅，我都係有嗰句講嗰句咋，你老人家在天之靈，千祈唔好嬲呀！」 （四十三）