William與Baby雖然被傳分手又復合，但早前Baby自製燈牌為男友音樂會造勢，而William又為Baby出頭，擘大眼講大話寸吳彥祖唔夠Baby高，看來兩人的感情有增無減。大抵兩人有感近期走勢不俗，有意組成情侶檔吸金，昨日他們出席聲演動畫電影《超鼠特攻》宣傳活動時，全無避忌在台上打情罵俏，慌死冇人知他們的情侶關係！

William被嘲面紅

一對小情侶齊齊現身造勢，期間絕無尷尬兼扭擰，表現甚有默契，有William在旁的Baby更全程甜到漏！當兩人分別獲大會送贈毛公仔時，貪玩的William趁機用公仔捉弄女友，令Baby不斷甜笑撒嬌。

問Baby會否抗拒與William合演談情戲時，Baby笑謂：「冇所謂，邊個都冇所謂，最緊要係劇本同角色，咁當然同自己朋友拍就最開心！（情侶檔拍戲會唔會收貴啲？）都唔會，平時活動都係收一樣錢。」而William則笑到四萬咁口表示不抗拒，Baby聞言後，即嬌嗲地說：「咁我就下你拍呢啲戲啦！」女友當眾撒嬌，氹得William開心不已。

除了不抗拒以情侶檔上陣拍戲外，他們更無懼拍親熱戲！但William面紅表示自己守身如玉，要求有級別限制，Baby見狀即忍不住取笑他：「你做咩面紅嘅？」令男友啞口無言。記者提議他們索性組成螢幕情侶，William即口窒窒兼講錯說話：「唔抗拒，我哋成日『同床』……唔係，係『同場』，形象都好健康同正面嘅。」

情侶檔未獲厚酬

William自爆是次活動地點，對他與Baby甚具意義，他謂：「五年前同Baby喺度做兒童節目試鏡，大家就認識咗。（咁係咪邂逅呀？）係認識嘅地方啫！」

已第三次合作的他們，Baby笑言未有因情侶檔關係而獲厚酬，她指起初不知William有份聲演，直至到達現場配音，得知對方已完成部分才知曉，並大讚男友配音效果出色。

文：影視組