憑藉中國戲劇學院的地獄式訓練，元秋練就一身好本領，加上她爸爸是當年一位在行內甚吃得開的武指，元秋得此機緣，便成為女主角的替身。

回巢表演‧喜賺外快

元秋說：「學校有個傳統，就係出嚟做嘢頭一年，所有人工都要交畀師傅，呢個傳統叫做幫師，即係好似依家嘅謝師宴咁。當年我好幸運，由於有師兄喺邵氏做武指，加上我又好捱得，乜嘢動作我都話OK，乜都照做，所以好多人都鍾意搵我幫手。嗰時人工唔錯，有成一百五十蚊一日，我全部都交晒畀師傅。」

在片場內，元秋無所不能，別人認為難以做到的動作，她卻輕易完成，乾淨利落，元秋說：「當年我替過凌波喺《女英雄》揸槍，又幫何琍琍揸劍，我淨係換過頭飾就得，所以當年我有個花名叫做『影後』。」

「影後」這花名自此在行內不脛而走，所有師兄弟人前人後也如此叫她，元秋至今仍十分回味這稱呼。因為元秋聽教聽話，好使好用，即使在滿師後，于占元師傅也經常要求她回荔園表演，向來審慎理財的于師傅也給予元秋相當不俗的酬勞，這不是金錢的問題，而是元秋終於得到師傅一個肯定。

元秋憶述道：「正式離開學院之後，師傅每個星期六都會叫我返荔園幫手做一日戲，每個月人工有成三百五十蚊，當時師傅肯畀錢我使，令我覺得好開心。」

身手了得‧樂於助人

于師傅如此看重元秋，除了她身手了得外，更在於其抵得諗的性格。想起當年在學院集訓的日子，于師傅每隔一段時間便要徒弟全體做二百下旋子，身為旋子（翻騰動作）好手的元秋即成為大家的救命繩，元秋說：「嗰時佢哋個個都叫我包底，譬如佢哋夾埋做一百下，我就要做埋其餘嗰啲，咁樣做好攰㗎嘛，所以我成日都要逐個求佢哋做多一、兩下，幫幫忙都好，等我唔使咁辛苦。」

元秋做替身贏得「影後」之名，吃過無數苦頭；至於在幕前風光的元彪，也有過一段與他有關的「辛酸史」。未來數天，有元彪真情剖白。

（四十二）