成龍出生於小康之家，捱苦兩個字從來跟他沾不上關係，可是一次與于占元師傅的邂逅，從此改變他的一生。

當年龍爸爸與于師傅私交甚篤，有次于師傅邀請龍爸爸和小成龍作客參觀七小福的練功情況，當年只得六歲半的成龍，看到元龍（洪金寶）等人的身手，驚訝與己年齡相若的孩童，竟可翻出在馬戲班才見到的筋斗動作，令他看傻了眼，頓萌起學武之心。

大開眼界‧簽約十年

成龍說：「嗰時我阿爸同于師傅好熟，有日阿爸帶我去佢度，我見到好多着住白Tee黑褲嘅人喺度練功，佢哋個個好似華山論劍咁騰雲駕霧，搞到我即刻鍾意咗功夫。」

在成龍的小小心靈，眼前的洪金寶恍若是周伯通，元泰則變了郭靖，元秋化身成黃蓉，成龍巴不得自己立刻變身楊過，跟他們過招比劃，因此決定加入中國戲劇學院，還滿腔熱誠一口答應簽下生死約。

成龍續說：「當時有人問我簽幾年合約，佢哋話有三、五、七、十年畀我揀，因為我覺得好好玩，就好豪咁話要簽十年，愈長愈好。」

原來眼前這一切只是假象，只是煙幕，成龍加入七小福後，才知道自己要去的不是華山，而是火坑，後悔當初下了這草率的決定，成龍說：「如果嗰陣一早知道咁辛苦，我一定唔會參加啦，我以為去玩o架咋，依家諗番起，終於明白點解當年加入七小福前，洪金寶會對住我奸笑，原來佢嘅意思係『你入到嚟就知味道』。初初我仲以為佢好歡迎我，後尾終於知道真相。」

師傅契仔‧身份特殊

成龍在學院的身份極之特殊，爸爸是師傅的莫逆之交，成龍後來更與于師傅上契，成為洪金寶外的另一股新勢力，成龍憶述道：「嗰時我身份都幾特殊，一來我係師傅契仔，又同佢食過飯，二來我識講法文同英文，個樣望落去好似有外國人血統，又有啲古靈精怪嘅西洋零食，又有個英文名Jacky，嗰時佢哋個個都叫我『御兒乾殿下』。」

（三十六）