前日鄭融出席商場活動時，疑被一名狂迷從後胸襲，事後保安捉獲卅六歲蔡姓男子。前晚鄭融在助手和家人陪同下到警署落口供，至凌晨十二時離開。鄭融說：「好攰，好頭痛，啱啱落完口供，想快啲返屋企。」
狂徒稱想同鄭融握手
經過一晚休息，鄭融昨早在四位助手和司機護駕下現身電台，在場逾廿多位男記者一擁而上，穿了闊領衫和低腰褲的鄭融表現有點失魂兼驚青，不時用單手護胸。鄭融在電台接受余宜發訪問，由於余宜發是前日活動的司儀，目擊事發經過，他表示事發前被狂迷扯住，對方稱想和鄭融握手，之後聽到鄭融尖叫，才知她被非禮。
鄭融坦言當時好驚：「之前都有留意嗰個男子，因為佢動作好大，自己覺得有危險機會，同主辦同助手講要小心，本來自己翹住手行，但咁啱有記者叫我，自己轉身打招呼冇防範。（係咪好驚？）以後一定更加小心，要同同事貼住行。（點樣解除陰影？）唔會係一個好深陰影，只係一件唔開心事發生咗，自己都要過番生活。」鄭融指警方提醒她不能說細節，可能影響案情。
之後鄭融接受報章和電視台訪問，重複說了六次內容，身心俱疲的她說：「依家好攰，條頸好梗，尋晚三點幾瞓，冇失眠。（工作有冇受影響？）照常唔會改，有警方跟進事件，自己放心繼續工作過我生活。」鄭融指前日活動主題健康，惟發生這件事令她覺得不好意思。
問她被非禮後有否哭過？鄭融說：「都有。（有冇即刻沖涼？）呢啲唔講，我覺得自己處理幾正當，尋日到依家都冷靜，只係事後一刻諗過唔想畀人知，但即刻諗由細到大教育，遇到唔好事要報警，唔可以當冇事，點可以畀做呢啲事嘅人逍遙法外。（疑犯話想同你握手？）我唔知道。」
問男友莊冬昕怎樣安慰？鄭融扮傻說：「我冇男友，收到廿幾個SMS，好多謝啲人打畀我。（會唔會收起性感？）就算每日樽領都唔關事，唔應該同性感扯上關係，我平時都係拍MV同台上演出至會性感。」
不滿被指性感惹遐想
對於有犯罪學家指鄭融在前一晚穿低胸裝出席《香港先生選舉》，估計疑犯受刺激做出失控行為，鄭融聞言沉默了半分鐘才說：「呢件事唔係我想發生，我覺得自己處理好適當，其他事唔回應。」
鄭融離開電台時，在門口遇到DJ小儀，小儀即飛撲擁抱，令鄭融激動得眼紅紅，之後急急上車往其他電台錄音。期間她抽空到又一城食飯，收工後再返經理人公司撇傳媒。另外，警方表示疑犯以一千元擔保，八月中返警署報到。
文：音樂組