日本著名大型時裝騷「Tokyo Girls Collection」，將成Angelababy（楊穎）及Chrissie（周秀娜）的新戰場。據知Baby落實成為今季行騷模特兒之一，該時裝騷官方網站近日正式張貼了Baby的個人資料及靚相。對於成為第二名進佔該騷的本地模特兒，Baby大感興奮，並透露九月五日於東京行騷：「份job係日本公司安排，雖然未知着邊個品牌嘅衫，但有得行騷已經好開心。」

Kama成局外人

雖然Baby勁敵Chrissie在官方網站不見蹤影，不過Chrissie經理人Roy表示：「日本方面係有初步接觸，但個期仲未諗。」據知諸葛梓岐（Marie）亦有份行騷，不過其經理人公司卻不願透露詳情。至於今季慘成「局外人」的Kama表示不感可惜：「我上次已經行咗，今次因為有工作在身，抽唔到時間啫。」

發誓冇整過容

另外，Baby日前接受本報訪問時，談到被指整容時反應甚大：「我發誓我冇整容㗎！其實之前話影到我個嘴有疤，根本唔係，我可以掹開個嘴畀記者影相證清白。」對於Janice Man進軍樂壇，Baby表示會否發展歌唱事業留待公司決定，不過卻直認與Janice現已甚少聯絡：「可能工作愈嚟愈忙，所以少咗見面。」Baby又透露現時沒有拍拖，希望將來對象能像米高積遜般舞藝超凡，擇偶條件與緋聞男友陳偉霆的專長十分符合。

文：專案組