曾志偉女兒曾寶儀為亞視歌唱選秀節目《亞洲星光大道》擔任主持，與無綫同類型、由劉美君主持的節目《超級巨聲》對撼，面對金馬影后級主持，雖然曾寶儀表示有一定壓力，不過她絕不擔心會比下去，揚言就算將二人比較亦是好事。

壓力一定有

曾寶儀被問到會否擔心外界拿她與劉美君比較？她大方謂：「面對金馬影后，當然有一定壓力，不過可以同日兩台有同類嘅節目，對樂壇嚟講係一件好事，好彩今次兩台參賽者唔同，所以主持方式都會唔同，難作正面比較。（外界依然會將你哋比較？）咁都係好事嚟，起碼有人注意，最怕係做咗嘢都冇人知啫。」

廣東話麻麻

原來曾寶儀曾打算推掉《亞洲星光大道》的主持工作，她說：「曾經諗住唔做，因為廣東話唔夠好，我一向係用普通話講嘢，所以冇自信，好似之前主持金像獎，我都用咗好多時間去準備，大陸都有搵過我主持同類節目，但係我冇接。（最後點解會做？）因為香港冇呢類節目，好有挑戰性，而亞視綜藝及資訊科總監賴華民亦都好有誠意，專誠到北京搵我做節目，最後我便一口答應。」

文：影視組