文武天才‧斷足淡出

在十多位杳無音訊的師兄弟中，元文可說是最令大家牽腸掛肚的，元彪說：「元文可以話係個天才，翻觔斗叻，文戲亦勁，文武全才，七歲就擔戲，仲要一出道已經好紅，師傅好錫佢，可惜佢後來喺娛樂圈發揮唔到。」

天才折翼最教人惋惜，對於這位命途多舛的小師弟，元彬慨嘆：「元文最細又最聰明，對我哋個個都好好，又幫學校搵最多錢。記得滿師後，有一年我哋同雛鳳鳴去三藩市做戲，開鑼前幾日去咗牧場玩，元文唔小心墮馬斷腳，醫生話至少兩、三個月唔可以落地行，結果要搵喺三藩市嘅元泰頂上，呢次斷腳對元文影響好大。」

未知是自怨自艾，還是一次意外，便認定餘生必充滿陰霾，元文開始與師兄弟日漸疏遠。然而一別經年，師兄弟對他的掛念始終不減，元輝說：「有時我會夢見元文返番嚟，我哋成班師兄弟個個攬住佢不斷喊，因為我哋真係好掛住佢。」

觔斗之王‧走火入魔

昔日同台演出，今日不相往來，往往教人更加撫今追昔，黯然神傷，元彬說：「有個師兄叫元音，佢嘅觔斗坐又打得、瞓又打得，打到奇形怪狀都得，冇人夠佢叻。有次佢又試打觔斗，點知跣腳失足，從此對打觔斗有陰影，以後都唔敢再打。後來有日佢唔知做乜又再打番觔斗，點知一打就唔識停，打到口水鼻涕流晒出嚟，要我哋成班師兄弟夾手夾腳㩒住先識停，我諗佢係練功練到走火入魔，佢後來又係不知所終。」

對於失散多年的同門，元彬選擇相信他們只是大隱隱於市，小隱隱於野，終有一日還是會再相見的，元彬說：「我希望失散多年嘅師兄弟妹，元文、元音、元祥、元春、元坤、元琪、元麗、元豹、元西、元虎、元超、元軍，無論有咩唔開心都好，今年係七小福五十周年，大家難得聚一聚，快啲返嚟搵我哋，我哋成班師兄弟都好掛住你哋。」（三十四）