Angelababy在首日書展中銷售稱冠，賣出高達八千本寫真，而Race同樣有好成績，即令網民質疑，昨日王友良及Annie G.為有人篤數一事踩多兩腳。昨日椋名凜（Rin）以和服打扮出席其新書和寫真Postcard簽名會，對於有傳o靚模篤數一事，她大表驚訝，而其新書至今則賣出千多本，她直言若銷量好，會推出第二本更性感的寫真，更不排除為慈善而全裸上陣。

Angelababy寫真銷量甚佳，工作人員要不停拆箱應急。

椋名凜三位師弟妹專程捧場，為師姐打氣。

「真係冇乜可能」

Rin好友王友良及其三名師弟妹昨亦有撐場，王友良表示聽過有o靚模篤數傳聞：「好想知道點喺5至6秒賣出一本？點漏夜加印一萬本？我覺得好有趣，好想知道工作人手的安排。我就睇唔到咁犀利，13小時排咁大條人龍買書，真係冇乜可能。」

另外，八模之一的Annie G.與Hailey C.昨日一起逛書展，對於Angelababy及Race的寫真大賣，Annie G.坦言不太相信，她說：「我計過要一分鐘賣十一本先得。」她其後在baby的攤位前用錶計時，結果並未達每分鐘賣出十一本的要求，但記者所見銷情仍然理想，工作人員要不停拆箱「應急」。

下星期搞慶功

baby的經理人Kim就銷量在電話中回應說：「今日賣咗幾多就唔知，尋日就賣晒，要補書同加印，要星期六先有，加印咗一萬本，第一批就印咗二萬本。尋日喺書展先有得賣，依家書報攤都有，本書賣得咁好，所以下星期會搞慶功。」至於周秀娜的寫真，昨日現場所見，上午已賣出二千本並一度缺貨，要即場再補，周秀娜經理人表示現已加印四千本，總數達二萬四千本。另外，Race經理人回應篤數時稱：「可能係言語間誤會，因為本書總共印咗八千，從冇話銷售八千，首日銷咗兩千本。」　　

採訪：名人組