初生之犢‧吐氣揚眉

元彪憶述七小福當年出埠的緣由，他說：「1969年師傅覺得我哋喺香港學嘅嘢已經差唔多，於是帶咗二十幾個徒弟過台灣深造，師傅喺嗰邊聽到有人笑我哋渣，佢好唔鍾意，於是要我哋喺台灣做兩日戲，結果我哋二十幾人，喺台上面做到好似有五、六十人同時做戲咁，當堂哄動全台灣，之後嗰日插針都插唔落，好多人買唔到飛，塞晒喺會場外面，有人為咗想睇我哋做戲，竟然打爛啲窗都要裝入嚟，嗰次演出令師傅喺台灣吐氣揚眉。」

能夠在台灣人面前贏回一份尊重，增強了七小福眾成員的信心，亦為後來美國之旅埋下伏筆，元彪續說：「到咗1973年，當時我已經滿咗師，做緊龍虎武師，有一日美國有間地產公司聯絡師傅，想佢帶團人去嗰邊演出，師傅就搵咗我同埋其他師兄弟，大概廿人去美國表演，起初反應都好好，去到後來至出事。」

雖然余秋雨在《觀眾心理學》中，曾引述史雷格爾指「一齣戲，是這個民族創作的，很少能令別的民族完全喜歡」，但七小福的確令黑髮黃皮膚的中國人、紅鬚綠眼的美國人，一樣如癡如醉，大概只有京劇可以突破地域界限，不管表演者是殿堂級的梅蘭芳，抑或是初生之犢的七小福。

美國之行‧黯然告別

可惜天意弄人，好景不常，於海外揚名立萬的背後，竟潛伏着一次極大的不幸，二師兄元泰慨嘆：「起初我哋穿州過省巡迴演出，反應好好，去到邊都爆棚，不知幾收得，記得最後一站去到羅省一個山頂做演出，點知個負責人突然夾帶私逃，拎晒所有錢走佬。嗰刻我哋至知嗰個人原來之前已經拖咗師傅成年數，師傅既徬徨又冇面，就係呢次被人走數，搞到師傅決定從此留喺美國生活，亦都係呢次美國之旅，令七小福正式散班。」 （廿九）