古巨基前晚在廣州開騷，不停以爛gag娛賓，還聲演基媽催婚，叫他在當地找又靚又純品的女朋友，令觀眾笑破肚皮，雖然基仔已是英皇人，但舊公司金牌大風都派人護航，基仔還搵小肥做嘉賓，見證友共情。
基仔前晚在廣州體育館舉行演唱會，由於這個騷當日是金牌接洽，現基仔已過檔英皇，故兩間公司都派代表出席，破格合作，基仔坦言這次是個別例子，至於會否再做巡迴？他說：「要睇兩間公司安排，自己有參與製作，都想多啲人睇到。」
小肥友情不變
前晚基仔邀請舊公司的小肥做嘉賓，問點解唔請埋英皇歌手？基仔笑說：「唔使計到咁，我同小肥好熟，佢好識唱歌。」兩人合唱《友共情》時，基仔有感而發說：「我哋兩個友情、感情，唔會因其他因素而改變。」
勁舞觀眾嘩然
廣州觀眾對演唱會上的3D畫面嘆為觀止，基仔除了大唱金曲外，還整晚搞爛gag娛賓，當他表演跳舞後，即古Sir上身自誇：「跳得好好，發揮終極，之後要退出舞壇。」觀眾隨即嘩然，基仔鬼馬說：「唔捨得吖？咁我即刻復出啦。」基仔甚至連媽咪都擺上枱，聲演基媽搞gag說：「返廣州搵女朋友啦，廣州女仔人品好又靚女。」令觀眾笑破肚皮。
文：音樂組