元德貪睡‧打入冷宮

數到七小福中最失控的戲台蝦碌事件，當數成龍一次由台上演到落台下的突發演出，成龍說：「嗰次我喺個台度要轉身，但唔小心差錯腳，成個人飛咗落台，但我唔使零點一秒已經即刻一個閃身飛返上台，連觀眾都唔覺我跌過落台，你話我身手幾厲害呢！」

今日說來雖然輕描淡寫，但成龍就曾在自傳《我是成龍》中，以「掉到舞台下恐怕是一個人可以犯的最大錯誤了」來形容這次丟臉的演出，然而，觀眾的心理畢竟是難以用常理揣測的，就像成龍電影散場前那些失手片段，往住更令人着迷，不過元德就沒那樣好彩了。

元德談到少年時一次貪睡經歷時表示：「有次師傅終於畀我做主角，但嗰齣戲有個場口係我喺個台度乜都唔使做嘅，點知我就喺嗰刻瞌着咗，瞓到有戲做都唔識醒，經此一役後，師傅再冇畀過主角我做。」

有得做主角，當然值得高興，更應好好珍惜，但原來在于師傅心目中，角色無分大小，只要有觀眾捧場，就同等重要，據元彬憶述：「有次師傅喺演出前專登通知我阿媽，話我又有演出，佢冇講到明叫你捧場，但我阿媽見師傅咁樣講得出口，都一定唔簡單啦，就咁掃咗大堂前連續三排嘅戲票，同成班親戚朋友嚟一齊睇個仔做戲，點知阿媽睇完第一幕，搵勻都見唔到我，後尾佢至知原來我係企喺後排做兵。」

元彬撻低‧愧對阿媽

元彬做兵，也不忘通知其家人出席以示支持，于師傅可說是俄國戲劇大師史坦尼斯拉夫斯基「沒有渺小的角色」理論的忠實支持者，元彬續說：「到咗第二幕，阿媽落足眼力，點知我就論盡到自己踩到褲腳撻咗落台，碌完落台，我即刻左遮右遮，費事畀阿媽睇到，梗係啦，買三行戲票嚟睇個仔點樣扮兵碌落台，你估真係好馨香咩！」（廿五）