洪卓立和陳偉霆（William）出席由森美、小儀主持的節目《千奇百趣》，William玩遊戲勝出，以為有機會品嘗美食，豈料遇上認真「奇趣」的八爪魚卵，生吞後即時想嘔，最後要死頂含住唔嘔。而向來身體孱弱的洪卓立見狀都被嚇一嚇，但衰「八卦」的他，探頭一聞險暈低。
滑潺潺似番梘
無綫節目《千》反應理想，計劃最後一集會拍特別版介紹香港奇趣。不過，今晚播出的一集，奇趣部分卻落在洪卓立和William的事後反應上。堂堂大男人的他們竟被一舊珍奇的八爪魚卵「玩謝」。洪卓立自知身體孱弱，之前大病一場後，對飲食已很小心，面對海鮮類更加不會亂食。所以當他眼見八爪魚卵時，覺得似滑潺潺的番梘，已心知不妙。雖然最後只需Willian食，但他「八卦」探頭聞一聞，都已暈得一陣陣。
至於要將八爪魚卵食落肚的William，雖在鏡頭前死頂，將活生生的八爪魚卵吞落肚，但結果出事，生吞完大叫「好嘢」後，一股「嘔意」湧上心頭，為免於現場失禮，最後都要將湧到上喉嚨的嘔吐物含住。
人生中最難食
William說：「今次食嘅都算係人生中最難食嘅嘢！以為贏咗有好嘢食，點知要食生嘢，當時我都叫啲工作人員煮熟先畀我食，但最後都要我生吞，對住鏡頭我惟有死頂，但一Cut機我就嘔，個感覺已經湧到上喉嚨，最後忍住，好彩冇失禮。（仲敢唔敢上呢個節目？）我會安排番小儀上我個《大咕窿》，要佢擒高板！」
文：影視組