三急難忍‧細水無聲

據元菊憶述，當年元彪就曾經試過在荔園戲台上撒了一泡尿，元菊說：「元彪嗰時好細個，嗰次個戲佢係扮太監，只須要企喺後面，唔使對白，冇特別動作，即係龍套啦，我就企佢旁邊做宮女，突然間元彪細細聲話『師姐，我好急尿呀！』，嗰陣個戲仲有排做，急尿都冇符㗎，我咪同佢講『唔得㗎，依家唔行得開㗎』，但係元彪話『我想屙尿』，我咪叫佢忍吓先囉，點知冇幾耐佢都係瀨咗。」

元彪聞言即開口為自己辯護：「師姐，當時我得六、七歲咋！好話唔好聽，真係行都未行得穩，仲要上台演戲噃，不過好在嗰次我企得後，咁啱嗰條又係深色褲，啲尿流到落條褲度都唔多覺，啲觀眾都唔知，不過最重要係連師傅都唔知道，如果唔係又試打通堂。」

微乎微乎，至於無形，神乎神乎，至於無聲。明明瀨到一褲子都是尿，還可若無其事，這不是《孫子兵法》虛實篇的精粹所在嗎？

然而元彪這種棟篤企式的邊瀨尿邊演戲，還不算經典，更經典的要數能文能武高材生元文的「邊走邊尿」。據元秋憶述：「元文嗰次要走圓枱，走得圓枱，台下個個都望實你，但元文嗰次走圓枱，奇怪嘞，點解佢走完之後，地下多咗個圓圈嘅？原來佢急到夠膽邊走邊屙，咁都得㗎喎，元文，你好嘢！」

膽大包天‧喪玩失場

除了將戲台變成無拘無束的大草原外，一班頑皮愛玩的七小福更玩到失場，元彪回憶那段膽大包天的歲月說：「嗰時唔到臨開場，我哋都唔捨得返去第六劇場化妝、着戲服準備出場，唔係去咗其他劇場睇表演，就係周圍玩機動遊戲，試過有啲師兄弟真係玩到冇咗影，嗰時就要靠其他師兄弟捱義氣，走多幾轉，換多幾次衫，轉多幾次妝，做埋佢嗰份，情願辛苦啲，總好過畀師傅知。」 （廿三）