G.E.M.最近取代江若琳成為鐳射新任代言人。據知與鐳射已有兩年合作關係的江若琳，與廣告商一直合作愉快，但由於廣告商與G.E.M.身邊人熟落，二人經中間人介紹後一拍即合，廣告商遂扑錘決定豪擲七位數字將G.E.M.力捧成新任代言人，更為她度身訂造廣告造型。

倦極嗌投降

由於G.E.M.向來表情多多，為了讓其發揮所長，廣告特意要求她在拍攝期間大做鬼臉，當中包括拿手好戲「金魚嘴」。由於要連續十小時「變臉」，精力十足的G.E.M.亦投降謂：「我覺得自己好似參加緊百變鬼臉挑戰賽咁，就連金魚嘴我都做到冇晒貨。」

對於被指因與廣告商相熟而搶走江若琳飯碗，G.E.M.助手表示絕無其事，而G.E.M.亦表示向來視江若琳為奮鬥目標：「以前見親江若琳呢個廣告都會停低望，希望自己個廣告出街之後，都會有人望啦。」另G.E.M.昨到電台宣傳新歌《All About You》，表示最近正積極做運動減肥：「化妝師仲叫我唔好食澱粉質，但捱咗一日已經好難頂。」

多廣告在手

至於江若琳經理人回應時表示不覺被G.E.M.搶飯碗，並強調與廣告商是在愉快的氣氛下結束合作關係：「每間公司都有自己嘅政策，只係今次我哋配合唔到啫。Elanne嚟緊都有好多嘢做，除咗有幾個廣告傾緊之外，嚟緊又會進軍國語市場，各位fans唔使擔心。」

文：專案組