七小福每天對着的是貓魚送飯，他們當然希望吃得好一些，不願吃殘羹剩飯。比較有家底的七小福，得天獨厚，經常有家人長輩給予零錢，這些較富有一族，通常會被「窮小福」奉若神明，能令自己黐得一頓好餸，「他」就一定是好朋友，為了吃得好些，竟形成了結拜風氣。

合縱連橫‧梨園結義

元彪憶述道：「我哋都會有私下結拜，但唔係因為性格相投，而係睇吓邊個有嘢食就結拜，冇嘢食就唔再結拜，好現實，例如有個師兄弟因為屋企開士多，所以佢阿媽探親佢都會攞一大袋罐頭畀佢，咁自自然然就有好多人搵佢結拜。」

元秋也很難忘這段「合縱破連橫」對抗大食王的結拜歲月，她那三毛錢叉燒結下不少緣分，疏爽豪邁抱打不平的作風，讓她在同輩中大受歡迎。

原來元彬也做過零食拆家，為師兄弟謀「福祉」，可是卻換來嚇破膽收場。他說：「我哋成日以為偷食師傅就唔知，點知佢乜都知，我記得嗰次我偷運咗兩支雪條上去，仲要分一條畀元武，點知都未食師傅就走咗上嚟，我嚇到半死，咪即刻將支雪條收入頂帽度囉，結果搞到成身都係，元武仲好笑，佢一聽到師傅嘅腳步聲，就嚇到成支雪條連棍吞落肚，真係服咗佢。」

麗池消夜‧談天說地

在學校食得偷偷摸摸，出外才可以大模廝樣吃個暢快，所以七小福每次到歌舞廳表演完後，勞動完畢，為舒一口悶氣，通常都會相約三五知己，坐在一枱吃消夜，既可祭五臟廟，又可秉燭夜談，說說是非，閒話家常。也許，這就是七小福每天的「貓頭鷹」時間。

元甫說：「食消夜好緊要，我哋會去樂宮樓、麗池食消夜，酒樓老闆對我哋好好，做完表演會請我哋飲蛋花湯、食炒麵，啲餸當然好過學校嗰啲啦！」就是簡單一碗蛋花湯，除充飢外，也增進了七小福的友誼。（十七）