對比今時今日衣來伸手、飯來張口的新生代，當年寄宿於中國戲劇學院的七小福，不但由朝到晚練功，睡眠不足，更加無啖好食。

元彪憶述那個經常處於飢腸轆轆的童年，他說：「飯餸上枱，三毛大師兄就會數『一、二、三、四』，等啲師弟夾餸，叫做畀你執幾啖咁喇，跟住佢就會『五六七八九十』，然後手起碗落，冚住晒啲餸，等你冇得夾，佢想食又冚唔到嘅，就吐口水，呢招係佢絕招，會唔會有冇人肚餓到連大師兄嘅口水尾都照食？冇！我哋寧願捱餓都要有骨氣。」

三毫叉燒‧抗大食王

寧願捱餓，也不要嗟來之食。元彪續說：「當年大家年紀仲細，大師兄咁做都係出於本能，始終師兄弟之間各有性格。」

而同門之中，更有三個出名大食的，元秋惟有聯合其他弱勢社群，共謀對策，她說：「我記得當年有三個特別大食嘅，被我哋封做『菜龍、菜虎、菜豹』，逢親開飯有『龍虎豹』喺度，我哋一定冇啖好食，好在我哋班細嘅都識斬料買叉燒，裝飯時塞喺碗底，搵啲飯遮住，如果同你老友，就拉你埋一邊，扒飯時就偷偷地畀塊你，連龍虎豹都唔知我哋有好嘢食。」

原來于師傅不容許有「私房菜」，元秋之所以有錢加料，全拜契爺所賜，她說：「嗰時我有個契爺成日畀零用錢我，我就成日用三毫子買叉燒加料，我就會用黃色紙包住，博師傅唔知道。」

分甘同味‧情感見證

與其獨食難肥，不如分甘同味，這份手足情懷千金難買，元菊說：「有啲師弟冇父母探，好似孤兒仔咁，有時我會用父母畀我嘅錢買魚蛋粉食，佢哋喺旁邊睇到，會話『可唔可以畀啲湯我飲』，雖然啲湯好好味，我都好想飲，但我都會畀佢哋，到有人飲可樂，又會留番幾啖畀其他師兄弟，就連蘋果芯、西瓜皮都係唔少師兄弟嘅美食，可能因為捨得分甘同味，所以我哋之間感情好好。」

說起食，自是一言難盡，七小福要經一番爭鬥才得溫飽，但口腹之欲與生俱來，他們又如何得到滿足呢？下回再續。 （十六）