小孩走在一起總是多爭拗，不過大多都是口角之爭，互不瞅睬，可是七小福在于師傅的訓練下，個個身手不凡，拳腳比口舌靈活，一言不合，不時以拳頭解決，誰的拳頭夠大，誰就成為「山寨王」。

熨斗擋拳‧理直氣壯

不要小覷元秋一介女流，但她生性男仔頭，好打不平之餘，更是「女拳霸」，人人忌她三分。儘管元秋拳頭打遍七小福，有一次跟元華吵架，卻令她留下不可磨滅的烙印，她憶說：「有次我同元華等一班師兄弟到台灣登台，當時每人一個衣架，其實我同阿華已經為衣架問題嘈完一輪，不過佢死都要霸住個衣架，咪怒火中燒一拳打落佢度囉，當時佢燙緊衫，順勢用熨斗一擋，嘩，我手臂即時遭殃，辣到我阿媽都唔認得，個熨斗疤仲喺度，我一世記得。」

元華卻不為此事內疚，認為元秋之傷與人無尤，他說：「當時我熨緊衫，佢一拳打埋嚟，自然反應梗係用手擋啦，唔通畀佢打咩，當時我揸住個熨斗，佢咪中招囉，唔怪得我。」命運之神就是掌管着元秋和元華之間的緣分，昔日的鬥氣冤家，多年後竟成為銀幕拍檔。

元秋天不怕地不怕，就是面對大師兄洪金寶（三毛）也無懼色，跟三毛吵嘴是家常便飯。元秋說：「我同三毛雖然關係唔錯，不過就成日嗌交，有次同佢出埠爭櫃用，嗰次真係嘈得好犀利。」

撩㷫三毛‧越級挑戰

在傳統舊社會，輩分清晰，階級分明，做細的不能有所僭越，但每個年代總有叛逆的一群，不甘屈服，敢於挑戰權威，就像小師弟元麟，無懼「惡」勢力，竟然膽敢向三毛挑戰，難怪連于師傅也稱他為「小神經」。

前文說過，元麟愛咬手指，曾被師母以鐵梳打得濺血，原來教訓他的不止師母，還有大師兄，元麟說：「我細個好鍾意咬手指，又非常百厭，所以師傅就叫我小神經。有時我特登撩㷫三毛，佢即時火遮眼一腳伸埋嚟，踢到我傷晒，返到屋企，我阿媽問我點解咁傷，我話係畀三毛打嘅，阿媽即大興問罪之師，三毛就反駁話：『阿姨，你個仔實在太百厭，唔打唔得。』」 （十五）