阿倫昨日為新碟《Mr. Tam再度感動》舉行發布會，一眾樂壇後輩包括劉美君、孫耀威、麥家瑜及Mr.到賀，現場不少電台高層甫見面就大讚阿倫囝囝譚曉風英俊靚仔，令腳傷未愈的阿倫即時笑到飄飄然，非常風騷。

曾志偉	劉美君性感到場，祝賀阿倫新碟大賣。	一班樂壇後輩現身撐譚校長。

冇女埋囝囝身

外界對曉風有讚冇彈，阿倫說：「佢靚仔過我係應該呀喎，我落重料呀嘛，佢都好似知道畀人偷拍，有少少唔開心啦，佢鍾意低調吖嘛。」阿倫表示囝囝鍾意聽音樂，但從未打算入行做歌手，更大讚曉風讀書成績非常好，阿倫說：「佢讀到書做乜都得啦，希望大家唔好騷擾佢，唔好逼我提早送佢去外國讀書，（好多女仔嗒糖？）冇女仔騷擾佢，我管得好嚴，畀我過目先啦！」

拒分五億身家

活動上，阿倫跟新進樂隊Mr.合唱，更笑言是他的五個囝囝，主音Alan即時笑言說：「我哋五個仔係咪一人分到一億身家呀？」阿倫笑笑口說：「五億？打『司益』就有。」另外，對於有雜誌拍到曾志偉跟新歡來往密切，阿倫說：「又有？咁叻？我冇見過喎，真係有艷福，志偉份人最鍾意扶貧，專收養啲無依無靠、冇衫着冇地方住嘅不明來歷女子，（你輸畀佢喎？）我有阿四，搬搬抬抬嘅一群阿四，仲有七位宮女，我贏晒！」

採訪：音樂組