前晚《美女廚房變節篇型男廚房》由謝天華、黃日華、黃秋生等任嘉賓，並找來新片女主角陳法拉、葉翠翠、呂慧儀等做助手，評判則是元彪及吳鎮宇。今次由男演員大展廚藝，各人都有板有眼，比一眾女演員還要熟手，只見三位男士斬雞、劈魚時力度十足，評判鎮宇亦下台表演切功。

期間，鎮宇又不時寸秋生及天華，眼見秋生試味時，在台上的鎮宇謂：「秋生做乜偷食呀！秋生哥真係食家，食到街知巷聞。」之後他又問翠翠炆火腩時有否落豆腐，翠翠表示沒有，他即打蛇隨棍上說：「我知，豆腐留番畀秋生食。」秋生即謂：「我哋呢啲大魚大肉唔使食豆腐嘅！」

吳鎮宇寸寸貢

試食時，秋生及天華那組的雞煮不透，鎮宇又寸秋生：「拜堂呀！攞隻生雞嚟！」而全場最多fans捧場的天華本打算表演淋酒起火，點知搞到「鑊底起火」，事後他說：「你估呢啲好易，冇咁上下功力都做唔到，平時十餐有八餐係我煮，不過洗碗就唔使預我。」問他拍戲傷耳的康復進度，他說：「應該埋咗口，依家要等啲焦甩晒就得。」

秋生事後大讚呂慧儀幫得手，記得所有步驟，說到鎮宇笑他吃豆腐，他說：「豆腐佢先食，佢要減肥，我哋呢啲咁fit 梗係大魚大肉。」

文：影視組