謝天華日前為新片拍攝一場被人爆樽的戲份時，耳背遭糖膠玻璃碎片割傷，血流如注，但天華堅持忍痛繼續拍攝，待停機後才到醫院縫針，而為免影響拍攝進度，天華正猶豫是否要聽從醫生意見，停工四、五日讓傷口復原。
謝天華孭重飛的《Laughing Gor之節》到目前拍了三分一戲份，日前拍一場吳鎮宇聯同手下李思捷對天華用刑的戲份時，天華不慎受傷，但他仍忍痛完成戲份，認真專業。
導演洗傷口
天華講述受傷經過時表示：「嗰場戲講我被鎮宇紮咗喺張櫈度，思捷爆我樽，可能角度問題，雖然係糖膠玻璃，但係碎片
傷咗我耳背，當時啲工作人員都唔知，因為場戲有道具血漿，到佢哋幫我沖洗傷口至發現我啲血係咁流，導演邱禮濤即時開咗支樽裝水幫我洗傷口。」
天華雖受傷，但仍擔心拍攝進度，他說：「個樽扑落嚟，我已經知乜事，爆完隻耳即刻耳鳴、麻痹，不過場戲一shot過，我唔想停機再嚟，所以頂硬上。睇完醫生縫咗兩針，佢叫我抖四、五日等傷口埋口。好彩今次冇傷到塊面，都可以拍住啲大頭面口戲份先。」
怕嚇親老婆
問天華太太有否很擔心？他說：「今次算係我受傷最甘一次，但出事時老婆仲瞓緊，我費事嚇親佢，所以冇即時話佢知。（鄭伊健、陳小春將拍江湖片，怕唔怕比較？）我唔介意攞嚟比較，難得影業復甦，要我客串都OK㗎，交流吓都冇問題。」至於「行兇者」李思捷昨日表示：「我都擔心天華傷勢，拍動作戲有時就係要預埋呢樣嘢，偏偏角度就係好難預計。」
文：影視組