「要贏人，先要贏自己﹗」Leon發揮「金句王」精神，昨拍攝林超賢新片《火龍》時挑戰自己，於銅鑼灣街頭凌空做出多款高難度動作。雖然全程有替身跟場，但每到戲肉，黎天王都親身上陣，只靠身上一條「威吔」保命，絕對發揮演員的專業精神！

黎明不慎跣腳，替身見狀即上前幫忙。	黎明（右）與對手打到飛起，齊齊跌落街。	雖然做足安全措施「吊威吔」，但場面依然震撼。
你睇吓！咁樣跳樓先夠型仔呀！（設計對白）	數以百計市民駐足圍觀黎天王的「高空工作」，場面虛冚。

數百市民圍觀

林超賢今次悉心為Leon在電影塑造一個打不死形象，昨安排Leon攀爬足足四層樓的大廈外牆。捉緊外牆鐵架的Leon等埋位時心情顯得相當緊張，穿上波鞋的他突然跣腳，失去平衡令他搖搖欲墜，替身拍檔見狀，即醒目地幫他將腳放回安全位置，可謂有驚無險。「高高在上」的Leon在外牆鐵架俯瞰旁邊天橋景色，吸引數百市民及歌迷圍觀喝采，更有歌迷帶來小型望遠鏡，將偶像的「歷史創舉」盡入眼簾。

雖然劇組早已向警方申報，有關方面更將附近馬路封鎖一半以助拍攝，但由於該區正值進行區議會補選，加上途人爭睇熱鬧，一度出現人車爭路場面。有人更罔顧安全，衝出馬路睇拍戲，情況相當混亂。眼見黎天王「企跳」打算由二樓平台對準鋪滿紙箱的路面躍下之際，圍觀者嘩聲此起彼落，未知是否因此嚇到Leon多番腳軟而窒步，足足NG四次之多，幸而最終順利過關。

製作費達卅萬

據悉，忙於拍攝《十月圍城》的Leon，還要積極為演唱會綵排，不過他早前看竣《火》片劇本後，即被吸引決定接拍，更前後花了兩個月時間作體能特訓。年屆四十三的他近日為《火》片開工，不時被傳媒拍得街頭喪跑、企跳、及化身空中飛人，絕對是搵命博。而昨日的一場重頭戲，劇組動員超過八十人，製作費達三十萬，並為Leon買重保險，動作指導錢嘉樂更在場打點一切，不容有失。

林超賢事後大讚Leon落力：「Leon狀態一日比一日好，相信日後佢都可以應付自如。不過佢演唱會舉行在即，拍埋今日（昨日）都會放佢回一回氣，所有大場面押後到八月先再拍。」

文：影視組

攝：李廣成