回復單身的庾澄慶（哈林）早前專程來港，與一名日籍索模拍廣告，但哈林竟「冷落」對方，反而與卡通人物史迪仔又攬又跳，狠心請靚女食檸檬！
向來形象健康的哈林，早前應香港迪士尼樂園之邀拍廣告，與一名日籍索模有不少對手戲，二人在鬧市跳舞，其後在寫字樓內取景，不過哈林與女模全程唔過電，反而與卡通人物史迪仔更加投契，不時攬頭攬頸，認真搞笑！
攬住跳舞
拍攝當天，一身粉紅色西裝打扮的哈林，與OL打扮的日籍索模襯到絕，但由於二人言語不通，只能靠翻譯溝通，因此未見太多交流。童心未泯的哈林，與史迪仔愈傾愈啱傾，全程猶如「孖公仔」，不時攬着對方跳舞和拍照，連哈林都大讚史迪仔搞笑，他說：「我拍嗰陣佢成日都喺鏡頭後引我笑，害到我NG連連，搞到成班工作人員都忍唔住大笑。」
經驗難忘
哈林又和史迪仔聯手整蠱日籍索模，趁對方步出升降機之際突然大叫，嚇到對方手上文件跌在地上，哈林更擺出一臉得戚表情，相當搞笑。
哈林表示今次拍廣告十分有趣，尤其是他首次與卡通人物合作，令他十分難忘，他說：「原來係咁好玩，希望下次都有機會啦！」
文：專案組