藝人慣例避談感情事，「事業為重」經常掛在嘴邊，不過隻身來港發展的JJ，卻是戀愛大過天：「好想經理人畀我拍拖，同埋傳媒畀多啲空間我。依家就算同普通朋友食飯，都畀人影到相，久而久之朋友覺得我好麻煩。」她打趣指可能經理人已婚關係，所以忽略她同樣需要感情生活。

曾受傷害

以往經歷種種情傷，JJ坦言每次戀愛來得匆匆，去得也快，更自爆屢遭「用完即棄」：「我好容易追、好容易心軟，可能因為咁，每次拍拖好快就發覺對方態度生變，跟住冇耐就分手。」

至於擇偶條件，JJ不介意與圈中人談戀愛，又謂首要條件是人品好，但談到與王祖藍於新片《矮仔多情》內談情，她靦覥補充說：「咁都接受唔到對方矮過自己，因為我缺乏安全感，需要保護。」JJ在新片中演性格清純的「邪骨妹」，賺錢返鄉建學校，又甘願為祖藍獻處子身。

文：影視組

攝：鄭家俊

首飾：Grosse、Thomas Sabo