勁舞新人王陳偉霆（William）近日狂跳狂跑，又狂隊12隻蛋白谷肌肉，為下月與狄易達「舞鬥」秘密練兵。有傳William與(o靚)模Angelababy已分手，但他坦言很希望邀對方睇騷，見證他處男登場重要時刻。
潮流興Battle，William與狄易達、張繼聰、麥浚龍、樂隊Mr.、Rubber Band，以及搞笑組合農夫和I Love You Boyz，將於下月廿九日起，一連四晚假九展舉行「拉闊音樂擂台」，互鬥一番。
狂隊12隻蛋白
作為新一代勁舞新人王，William當然與狄易達「舞鬥」，這是他首次擔大旗做主角，孭起整個音樂會。William坦言心情緊張，不過為了將狀態推至最高峰，故近日經常赤膊狂跑練氣，更自製Fit爆食譜。他說：「依家戒食澱粉質，再狂隊12隻蛋白谷肌肉，食咗唔夠一星期已經好悶，不過我會當作挑戰。我咁大個人，第一次做嘢去到咁盡！」現時150磅的William，目標不是重量，他說：「我希望練成六舊腹肌，0%脂肪，好似郭富城咁勁。」
向郭富城致敬
視郭富城為偶像的William透露，為了向城城致敬，音樂會中有特別編曲和舞蹈。他說：「因為我認識城城嘅化妝師，佢話我知城城都有留意我嘅演出，而且對我有啲意見都透過呢個化妝師傳話，我全部記住，如果有機會見到城城，同佢傾偈，我諗我會興奮到瞓唔着。」
早前有傳William與緋聞女友Angelababy分手，問他會否請她見證他的處男騷？William說：「我都想請佢嚟，不過最近太多新聞，唔想被誤會炒作新聞，所以要慎重考慮係咪真係請佢嚟！」
文：專案組