黎明（Leon）為下個月開鑼的演唱會，早就展開地獄式健身訓練，上山下海，繼打網球後，更加投奔怒海，激玩水上運動，由滑浪風帆到獨木舟，不過首次玩滑浪風帆的他卻良久未能起帆，顯得有點狼狽。
今個夏天Leon忙到透不過氣，既要連拍兩部電影，由烏卒卒的乞兒到滿臉鬍鬚硬漢子，形象作出一百八十度的突破轉變，不過一眾Leon迷大可放心，七月的演唱會Leon又會快速變回原來官仔骨骨的靚仔樣。
每日狂操兩小時
為求在演唱會以最佳狀態登場，Leon早在兩個月前就為自己定好時間表，展開地獄式的健身計劃，每日狂操兩小時以上的運動，繼之前勤打網球，最近又激玩滑浪風帆、獨木舟等水上運動，實行上山下海，將身形操到最弗。
獨木舟拋甩對手
第一次玩風帆的Leon，經導師指導下立即嘗試起帆，但當日風向不穩，Leon屢次嘗試亦未能順利起帆，顯得有點狼狽，最終花了很長時間才成功起帆，不過Leon說：「雖然係辛苦，但好值得。」
之後Leon再挑戰獨木舟，玩到興起他更即場撩助手比賽，結果Leon輕鬆拋離對手贏出，他立即倒轉手指公取笑助手說：「你不停喺度打圈，都唔係划前，笑死我。」
文：音樂組