眾所周知，女性在梨園的地位一直不可能與男性平起平坐，成龍曾在自傳《我是成龍》中這樣的寫着：「在國劇傳統上，女性角色總由男人來演，因為女性被認為是不吉利的象徵，但她們被禁止上舞台的時代已過去，而師傅也很溫和的接受了這種轉變。」

打通關卡‧跳出香港

在七小福口中，于占元的大老婆，即于素秋的生母就是「師娘」，專責照料于素秋；于師傅的細老婆就是「師母」，經常參與學院事務，包括1969年協助一班徒弟到台灣表演。

元彪說：「嗰時我哋個個都係細路，嗰個年代出境要辦簽證，因為師母人面廣，就係佢出動人脈關係，幫我哋搵咗班太平紳士做擔保，我哋先至搞到護照，如果冇師母，我哋要跳出香港，真係唔使旨意。」

連小師弟元麟都對師母讚不絕口，大讚她與師傅真的很「夫唱婦隨」，元麟說：「師母同師傅一樣咁嚴，嗰時我好鍾意咬手指，師傅鬧過好多次，我都戒唔甩，有次我又慣性咬手指，咬得津津有味之際，師母梳梳吓頭，突然一把鐵梳打落我隻手度，我啲手指即刻一個個窿標晒血，之後我都唔敢再咬手指。」

師母這種愛放冷槍喜怒無常的性格，在眾徒弟心目中成功建立威信，元心說：「有時我哋啲家長去學校探我哋，師母見到佢哋會滿面笑容，但當啲家長走晒，上一秒仲笑笑口嘅師母，下一秒已經黑口黑面咁對住我哋。」變臉速度之快，難怪令一班天真無邪的小孩心生敬畏。

親生女兒‧懲罰加倍

即使是親生女元茹，師母也不留情面，元茹說：「阿媽係典型上海人，好講面子，要做到人人對佢都有口皆碑，所以我同元仙嗌交，元仙打三藤，我就打六藤，因為佢要做畀人睇，佢個女都係冇優待。」

元菊也不忘細說師母如何充當師傅的「賢內助」，她說：「師傅在場就師傅打，師傅唔在場就師母打。不過，細個唔覺師母好，只係識驚佢，依家諗番轉頭，至知師母好有功勞。」