林峯處男騷「峯‧情無限Let's Get Wet演唱會」昨晚假紅館開鑼，染了啡金髮、穿銀西裝型仔登場，更由女舞蹈員用高跟鞋撐着下腹，擺出45度傾斜甫士勁歌熱舞，由於位置甚近「小峯」，場面火辣。之後林峯還緊張得說話口窒窒：「今晚開個唱好多人講『會唔會開得太快』，我都覺快咗啲，但我會把握機會做到最好。」
表演嘉賓泳兒穿熱褲出場，由於腳踏四吋高跟鞋，林峯體貼地拖着她合唱，令女fans尖叫抗議；另一嘉賓王祖藍上台時更搞爛gag說：「實力派冇用，最緊要我哋呢啲偶像派。」當他問觀眾林峯是偶像派或實力派時，觀眾兩者都鼓掌，祖藍大讚林峯完美，但卻取笑他說：「你靚仔冇乜用，多女友先有用，你出道到依家得三個女朋友，鍾嘉欣、鍾嘉欣、鍾嘉欣。」林峯只有傻笑回應，然而嘉欣昨晚沒有捧場，只見前緋聞男女吳卓羲和佘詩曼、無綫高層樂易玲等。
