本文重點
一連兩場「峯‧情無限Let's Get Wet演唱會」將於後日開騷，昨午林峯首踏紅館後台排舞，全場清一色女舞蹈員。林峯不但擘髀讓女舞蹈員捐褲襠，還擺出傾斜甫士，任由女舞蹈員在他後面箍大髀，然後又被另一女士瞓地以雙腳撐住他的下腹，極度貼近「小峯」，場面異常火辣。
拒絕戴護罩
林峯表示正式演出時，女舞蹈員會穿高跟鞋上陣，問到怕不怕被踩歪誤中「小峯」？林峯說：「冇事，佢哋踩得好準，唔會踩到，我好放心，佢哋訓練有素。（使唔使戴護罩？）唔使。」林峯又指演唱會上只有女舞蹈員和女模特兒，但就不是他要求全女班。他說：「唔係我要求，係製作部想演出man啲。（好艷福喎你！）我會專注唱歌。」
雖然開騷在即，但林峯前晚仍要亮相《勁歌金曲》。他謂早兩個月緊張到失眠，並透露緋聞女友鍾嘉欣不會做嘉賓。問有否送飛給嘉欣時，他笑說：「佢唔係唔買呀？仲要送畀佢？」
文：音樂組