楊怡昨日出席無綫劇集宣傳活動上，慘被黃浩然、馬浚偉以水槍圍剿變成「落湯雞」，不過楊怡完全沒有怨言，更愈射愈高興。
楊怡、馬浚偉、黃浩然、敖嘉年及張美妮等昨日出席無綫劇集《碧血鹽梟》宣傳活動時，大玩拔河及射水槍遊戲，期間在水槍環節中，向來鬼馬爛玩的楊怡即為成被攻對象，慘變槍靶，其中黃浩然更拉開楊怡的雨衣，毫不留情迎面射水，絕不憐香惜玉，難怪楊怡由頭濕到落腳，更表示就連耳窿都入晒水。
耳窿入晒水
「落湯雞」楊怡對於成為眾矢之的並未見生氣，更興奮表示：「好開心，未試過可以喺宣傳活動上面玩得咁癲。（但係你好多「仇口」喎？）係啦，都唔明白點解，黃浩然係我隊友嚟，佢都唔幫我，個個目標都係射濕、攻擊我一個，可能佢哋知我玩得啩！枉我平時好好咁照顧佢哋，黃浩然仲射得好準，搞到依家啲水入晒耳窿，雖然未至於耳鳴，不過陣間睇醫生叫佢畀錢。」
當黑周身傷
此外，右手包着紗布上陣的馬浚偉，透露之前拍攝《蒲松齡》時不慎拉傷，他謂：「呢排好黑，又撞親頭又傷眼，好邪呀！監製話因為《蒲》屬於鬼神嘅片，叫我戴番塊玉擋擋，不過我唔信呢啲嘢。」
至於《碧》劇監製李添勝透露，劇集首開收視約廿七、八點，成績算不俗，他表示《巾幗梟雄》首開收視亦大約廿九點。
文：影視組