人氣模特兒周秀娜（Chrissie）昨日帶同四位靚模師妹出席街舞活動，五美晒長腿造型青春可愛，完全將打扮密實的莊思敏比下去，雖然風頭被搶，但莊思敏仍大方與眾靚模合照，Chrissie亦「禮尚往來」自認師妹，把師姐之位拱手相讓莊思敏。
周秀娜近日人氣爆燈，昨日帶同「八模兵團」其中四個小師妹A.Lin、Hailey C.、「A貨Baby」Annie G.及「翻版阿嬌」DaDa Lo出席「亞洲街舞巡迴錦標賽決賽」，同場還有模特兒莊思敏、前E-kids成員Tommy及組合Bro 5。A.Lin、Hailey C.、Annie G.及DaDa齊齊以背心短裙仔上陣，大晒修長美腿，Chrissie的風褸雖然較密實，但一身桃紅色熱褲配修長美腿造型同樣搶鏡，結果盡搶前輩莊思敏的風頭！難得莊思敏完全不介意，更大方應記者要求與五位師妹合照，眾人在看台欣賞比賽時，她更與Chrissie密密斟非常投契，盡顯前輩風範。
撐劉欣宜為人不錯
五美表示正跟Bro 5成員學跳舞，故昨日專程捧場，問她們學跳舞有甚麼趣事？A.Lin謂：「拉筋最辛苦，有時拉唔到會被老師大力㩒落地，真係好痛！」對於「E Cup乳模」Lavina與「E Cup Baby」劉欣宜傳不和，A.Lin及Hailey C.坦言曾與劉欣宜合作：「相處落都覺得OK，但係我哋就唔識Lavina！（撐劉欣宜？）無話支唔支持，可能係誤會啫！」
學歷不足拒選港姐
與師妹齊齊學跳舞的Chrissie，獲老師讚柔軟度不俗，問她會否不及師妹們柔軟？Chrissie笑言：「我哋一樣年紀㗎，佢哋係小師妹，我係師妹，莊思敏先係師姐呀！」至於今年候選香港小姐有她的翻版，Chrissie說：「好開心，終於有自己翻版，覺得好得意。細個阿媽都叫我選港姐，不過我覺得自己口才唔好，學歷又唔夠，唔夠美貌與智慧並重所以唔敢參選！」
文：音樂組