Angelababy再被指靚樣有異，除面形變得飽滿外，最離奇是大笑時也不見有眼紋，不過Angelababy就舉手否認曾「加工」，還幫緋聞男友陳偉霆（William）澄清隆鼻之說；對於William傳另結新歡，Angelababy話William已向她交代了。
屢傳整容的Angelababy，昨日身穿露臍裝、超短褲和古巨基齊出席慈善活動。剛自日本回港的她，被發現又再「變靚咗」，昔日瘦削的面頰突變得飽滿，最異於常人是她大笑時，儘管嘴角笑到現梨渦，但其眼尾卻未見有半條表情紋，此「奇貌」再惹起變臉疑雲。
陳偉霆交代冇新歡
不過Angelababy就賴和新髮型有關，她說：「我紮高咗頭髮，以前劉海多，之前（額頭）多粒粒，已睇中醫排毒。」問她在日本可有朋友教她整容？她突然舉手說：「冇，我冇整容，我想講咗好耐。（怕人懷疑？）唔怕。」Angelababy覺得女仔一定愛靚，故她不反對整容，如將來年老有皺紋時，她會試打Botox，但現時尚年輕暫不需要，她解釋：「怕整容後，老咗會有副作用，唔想做呢啲嘢改變自己個樣，朋友做冇問題。」
問Angelababy緋聞男友William也被傳隆鼻，她即代「好友」澄清說：「我五、六年前識佢時，佢個鼻都咁高㗎啦。」至於有傳William暗撻「翻版謝婷婷」，她坦言William已向她否認，還漏口風指經常和William保持聯絡，那是否溝通感情？Angelababy好玄說：「係溝通，但冇感情。」她表示如男友偷食會很傷心。問她為何不見了她和William的情侶紋身，Angelababy掩住盆骨位說尚在，但不是情侶紋身：「係類似但不一樣。」並自爆William是跟她紋，而她手上正戴住和William齊代言的閃石錶。
基仔IQ書撼靚模
另外，曾搵Angelababy拍攝個唱3D短片的基仔，就不覺對方「變樣」，他說：「同上次見一樣咁靚，係不變嘅靚囉。」基仔透露暑期時會推出「古Sir IQ題」的書，問他可擔心不夠靚模的噴血寫真撼？基仔就覺得靚模是滿足視覺，但他的書是動腦筋，兩者的層面不同難比較。
採訪：音樂組