前晚Eason、樂隊Swing及Mr.舉行「SAME WRONG SIN」音樂會，好友黃偉文、蘇永康、何韻詩及父母到場支持，太太徐濠縈及囡囡陳康堤亦睇足全晚，當記者上前影她時，康堤即鬼馬地用大會的打氣棒遮面，在台上的Eason見狀亦揚手示意記者離開，認真愛女心切！

當晚樂隊Swing穿着「價」、「不減」的字樣Ｔ恤演唱。	Mr.表示能與Eason同台演出，甚為興奮。	（左起）蘇永康、康堤及徐濠縈均有現身支持。

要即時戒煙

Eason以新碟《H3M》的「鬍鬚佬」造型出場，唱到聲沙的他笑言：「諗諗吓喺台灣唔應該唱四個鐘咁益佢哋！」事後Eason直言聲帶受損：「可能喺台灣太放肆，大前日睇咗醫生，佢話正常聲帶係白色，我已經係紅色，仲有息肉、生咗繭，仲有水腫！」由於情況頗嚴重，被醫生勒令即時戒煙，Eason更要服用類固醇：「唱live無得保留無辦法，不過我唔係成日食。」

Eason獲新城高層朱明銳送贈紀念T恤。

完騷後Eason一家去食消夜，有粉絲舉起報紙遮擋鏡頭，護送他們離開。

厚面皮自薦

Eason又翻唱王菲的《開到荼靡》及黃家強的《麻醉》，直言很懷念阿菲的聲音：「我發現我同佢哋都係新藝寶，係勁人先入得㗎！雖然我唔係用嗰隻洗頭水，『動L』！」說罷即扮成龍撥頭髮的動作，又自爆自薦做家強、阿Paul的演唱會嘉賓：「係我自己打咗畀阿Paul話想做，好厚面皮自薦，不過機會要自己爭取！」尾聲時，唱得興起的Eason更主動多唱三首冧歌迷！Mr.事後亦表示與Eason同台獻唱好興奮。

完場後，Eason與太太、囡囡及蘇永康到灣仔消夜，Eason搞笑自備私家湯壺到場，眾人於凌晨一時離開，有粉絲舉起報紙遮擋鏡頭，護送偶像上車，康堤見記者拍照即眼仔碌碌任影唔嬲！

文：音樂組

攝：謝國華