對首張大碟最近在香港熱播兼取得好成績，Lenka表示感到非常開心，並為自己的音樂能令大家心情更好而高興。現年三十一歲的她，其實是做戲出身，年少時更曾向澳洲女星姬蒂班查學藝。她說：「我當時只得十三歲，參加了演技班，咁啱當時由正喺學院進修嘅姬蒂做導師。佢當時仲未紅，不過喺澳洲已無人不識。」

有意雙線發展

Lenka表示當時只屬玩票性質，她大讚姬蒂十分有啟發性，經常給予鼓勵，雖然有時上堂好悶，但會提醒學生如果對事物欠缺熱情便難以享受，她指現時較愛唱歌，並覺得有時唱歌如做戲。《The Show》一曲在美國人氣電視劇《俏Betty》熱播，她笑指若該劇找她客串一定答應，未來或會唱歌演戲雙線發展。

Lenka的歌曲給人開朗俏皮感覺，與英國歌手Lily Allen曲風有幾分相似，但她不客氣說：「我覺得幾唔同，佢好似有多啲特定題目去講，而且佢咁愛講粗口，仲比我無禮貌得多。佢可能想表達畀年輕人睇，而我就好似表達畀啲五歲小朋友咁，哈哈！」曾任兒童節目主持的她自言愛細路，一定會結婚生仔做人母，又愛保持兒童心境面對世界。

期待來港購物

現移居洛杉磯的Lenka，對於豬流感（H1N1甲型流感）全球肆虐，她不大擔心：「初時因為要成日飛都有點擔心，但其實都係普通流感。而且我有用一個叫Neti Pot的印度洗鼻工具，雖然感覺好似游水時有水入鼻咁，但佢幫你潔淨個鼻，我用咗之後都冇病過。」

將於８月初首度來港宣傳的Lenka，將與fans見面：「我未去過香港或中國任何地方，聽講香港Shopping好正，所以好期待！」

文：外娛組